Achraf Hakimi afikishwa kortini kwa madai ya ubakaji

Mchezaji wa Paris Saint-Germain, Achraf Hakimi, anatarajiwa kushtakiwa katika mahakama ya jinai nchini Ufaransa kufuatia madai ya ubakaji yaliyotolewa dhidi yake.

Mamlaka za mashtaka zimethibitisha kuwa faili ya uchunguzi imekamilika na sasa kesi hiyo itaamuliwa na mahakama.

Hakimi, ambaye ni beki wa kulia wa klabu ya Paris Saint-Germain na Morocco, amekanusha tuhuma hizo tangu zilipoibuka mwaka 2023.

Kupitia mawakili wake, amesisitiza kuwa hakufanya ubakaji na kwamba kulikuwa na busu la hiari pekee.

Kwa upande wake, mlalamikaji anadai alibakwa.

Ripoti za vyombo vya habari vya Ufaransa zinaonyesha kuwa alikataa kufanyiwa uchunguzi wa kitabibu, vipimo vya DNA, uchunguzi wa simu yake pamoja na kutaja mashahidi.

Kilichotangulia

Kesi hiyo ilianza baada ya mwanamke mwenye umri wa miaka 24 kuripoti tukio hilo katika kituo cha polisi karibu na Paris.

Baada ya malalamiko hayo, waendesha mashtaka walifungua uchunguzi rasmi na kumweka Hakimi chini ya uchunguzi wa mahakama (mise en examen)--hatua inayoruhusu uchunguzi wa kina kabla ya kuamua kama kesi iende kusikilizwa mahakamani.

Sasa, waendesha mashtaka wamependekeza kesi hiyo isikilizwe katika mahakama ya jinai, ambapo ushahidi na hoja za pande zote mbili zitawasilishwa hadharani.

Msimamo wa Hakimi

Hakimi amekuwa akikanusha tuhuma hizo akisema ni za uongo. Awali aliwahi kueleza kuwa suala hilo ni jaribio la kumhujumu, huku klabu yake ya PSG ikiendelea kumuunga mkono wakati wa uchunguzi.

Endapo atapatikana na hatia, sheria za Ufaransa zinatoa adhabu kali kwa kosa la ubakaji, ikiwa ni pamoja na kifungo cha muda mrefu jela.

Kwa sasa, uamuzi uko mikononi mwa mahakama ambayo itachunguza ushahidi wote na kutoa hukumu kulingana na sheria.

Kesi hiyo inaendelea kuvuta hisia za mashabiki wa soka na umma kwa ujumla huku macho yakielekezwa katika hatua za kisheria zitakazofuata.